試用期的原意是讓僱主與僱員雙方有一段互相「試用」的期間，以評估是否適合正式建立長期的僱傭關係。這段期間通常為三個月，但法律並無硬性規定必須設立試用期。試用期內，僱主可以觀察新員工的工作表現、態度及適應能力，判斷其是否符合公司要求；同時，僱員也能藉此了解工作內容和企業文化，評估是否願意長期留任。
網民在網上專頁「奴工處」上發文指在試用期完結的前一個工作天，上司按例行程序與事主會面，檢討工作表現以及通知事主是否通過試用期。起初上司盛讚事主的表現，形容「有交帶又快手」，可是話鋒一轉，上司就取出一張寫有事主如廁時間的紙，表示統計過事主如廁的時間，認為過長，日後需要改善。經歷引來眾網民的熱烈討論。
即睇事主分享及網民回應：（按圖了解）
事主：宜家份工返咗就嚟3個月，今日收工前上司叫我review……
上司：「過埋聽日你就三個月啦，呢段時間你覺得點呀？有無啲咩想同我反映呀？」
事主：「無呀，同事好好，畀好多機會我，所有嘢都Pick up得幾好，唔知你會唔會畀啲意見我呢？」
上司：「我好滿意你表現，有交帶，做嘢又快手！不過有個少少嘅建議，去廁所嘅時間可以短啲同次數少啲……」
跟住佢攞咗張紙出嚟，上面寫咗幾個Teammate嘅名，同有一個Table list咗好多項……
上司：「我整咗個表做統計，你平均一日去4次，每次大約6分鐘，一日有成接近半個鐘都喺廁所度，咁樣會影響工作表現，你自己注意吓啦！」
跟住通知我通過試用期就出返去…….
我當下真係想反白眼，去廁所係生理需要，咁要檢討咩？？？？
網民A：之前返工，我飲水嘅量每日都差唔多，所以大約10:30就要去廁所。
有日上司問我係咪係外面接咗啲私人生意，話因為見我日日都差唔多時間去洗手間……覺得我係去處理啲私人/覆客訊息之類。
我問返佢其實有咩工係每日只要朝早定時覆客，而且5分鐘內就可以搞掂，咁就賺到錢，我都想賺吓！
佢答我：咁我又諗唔到啊……
網民B：我份新工有位好厲害嘅女上司，佢可以食Lunch同放工先去廁所，搞到我唔敢去咁多次！因為我去廁所要路經佢個位，會見到我行過。我宜家10至11時去1次，中午食飯自己時間又去一次，下午3時去一次，有時下班去一次先離開。
網民C：一間去廁所都要寫低嘅公司，早走早着啦！
網民D：我好耐以前返過一份工，老闆平時最常就係用電腦Mon住我哋做咩，同隔住塊單面鏡睇住我哋做嘢！
我返到第5日嘅時候，老闆突然間好似有事公告天下咁，我以為咩事，原來係經過佢過去3至4日嘅觀察，做咗張表，寫明我哋每人每日去幾多次廁所，仲話大家嘅年底獎金係會因應去廁所既次數有所不同……
全公司只有7至8個人，廁所已經成間劏房咁細，仲要畀人懷疑你去廁所係為咗偷懶……
我當刻就決定咗即時辭職！
網民E：先讚完你做嘢快手，跟住又話去廁所影響工作表現！真係咁影響就唔會覺得你做嘢快手啦！
網民F：如果女同事有月事咁點計？
網民G：如果去廁所都做咗個表，想你去少啲，都幾唔人道！連去廁所都要有壓力，真心唔值得！試下搵其他工會好啲！
網民H：上司咁多時間數住你哋去廁所，證明佢不務正業，第一個就應該炒佢！
網民I：真係有啲咁嘅上司！叫你入房傾好似關心你工作適唔適應，又問你公司有無問題，叫你畀意見！其實最想話你呢樣嗰樣唔應該！呢啲工，真係襯未過試用期快啲走為上着！
網民J：你上司有啲怪，佢一定未見過入廁所成半個鐘都未出嚟嘅人！做到嘢咪得，一定要畀說話人聽咁！
上司花時間統計員工如廁時間，甚至將其作為評核標準，無疑是對員工基本生理需求的忽視與不尊重。工作效率固然重要，但人性化管理更是企業長遠發展的基石。員工不是機器，他們需要適當的休息和空間，才能保持最佳的工作狀態。工作是生活的重要部分，但絕非生活的全部。只有在尊重與理解的環境下，員工才能發揮最大潛能。
Article By CTgoodjobs